السنة التحضيرية للمسار الطبي بجامعة أم القرى - الطالبة سمية خان

بسم الله الرحمن الرحيم

السلام عليكم ورحمة الله وبركاته

لاحظت انه كثيير منكم حايسين لذلك ح احاول اكتب كل الجوانب اللي اتطرقتلها في هادي السنة بإذن الله 

السنة التحضيرية الطبية تعتبر ميزة وشي طيب لأنها بتهيئنا للتخصص الطبي اللي نبغاه .. بس والله كرف مزبوط < عمري ما انكرفت كدا 

لذلك من وجهة نظري اشوف انه السنة التحضيرية بكبرها عباره عن اختبار .. والناجح فيه هو اللي يقدر يجيب درجات رغم كل الضغوطات اللي حيتعرضلها .

ح اكتبلكم كيف كنت اذاكر لكل مادة .. وطبعا طريقة المذاكرة تختلف من شخص لآخر 

- الترم الأول :
الترم الأول جدا سهل وبنات كثيير جدا جابوا الـ4 (المعدل الكامل)عددهم كان 153من أصل 800 بنت " أعتقد أكثر من كدا عدد بنات الدفعة " وعملولهم تكريم وحركات وكدا أما الأولاد كانوا 70 تقريباً اللي جابوا المعدل الكامل . 

أولا : اختبار تحديد المستوى :
اختبار تحديد المستوى هو اختبار يحدد مستواك واذا جبت المستوى الرابع تاخذ اعفاء يعني تنزلك المادة في المعدل بـ A+ بدون ما تدرسها
لكن اتلغى للأسف السنة دي < ضاعت اجازتي وانا اذاكر واستعد له 

المواد وعدد ساعاتها : 

1- اللغة الانجليزية : 6 ساعات في المعدل .. أكثر المعدل يعتمد عليه لذلك حاولوا قد ما تقدروا تجيبوا فيه الـ A+ .
المنهج عبارة عن كتابين من كتب headway اول كتاب كان مستوى elementary و كان جدا سهل وتافه , أما الكتاب الثاني كان مستوى pre-intermediate وكان اصعب من اللي قبله شويا < مو صعب لكن أصعب من اللي قبله افهموها انتو عاد
- طريقة مذاكرتي له :
الكتاب الأول بصراحة ماكنت اذاكره لأنه كان جدا جدا سهل وكل الكلمات اللي فيه غالبا كنت عارفتها, أما الكتاب الثاني كان أصعب شي فيه القرامر وكنت أفتح في اليوتيوب على شروحات للقرامر .

الاختبارات :
الاختبارات عندنا بشكل عام تنقسم لـ 3 أقسام (كل المواد اختباراتها وكويزاتها بالانجليزي ماعدا مادة مهارات التعلم):
1- اختبارات قصيرة "quiz".
2- اختبار منتصف الفصل "med-term".
3- اختبار نهائي "final exam".

اللغة الانجليزيه كويزاتها تختلف من استاذه لأستاذه من ناحية الأسئلة ومن ناحية عدد الوحدات الداخلة في الكويز .. يعني مثلا استاذتنا اختبرتنا أول مره 5 وحدات واستاذة الشعبة الأخرى اختبرت بناتها وحدة واحدة بس .
أما الميد ترم اختبرنا فيه كتاب elementary وكان الاختبار فترتين يعني مثلا 15 شعبة تختبر أولا وبعدين 15 شعبة تختبر بعدهم . كان اختبار الفترة الأولى جدا سهل وكثييير جابوا الدرجة الكاملة .. أما اختبار الفترة الثانية يُقال إنه كان صعب وقليل جدا اللي جابوا الفل مارك , ولما جيت أسأل صحباتي عن درجاتهم كان أغلبهم ناقص 5 درجات وفوق .
أما في الفاينل شعبتنا كان اختبارها في الفترة الثانية .. وكنت قبل ما أدخل الاختبار اشوف البنات مبسوطين ويقولولنا سهل مرررة وياريتنا ما ضيعنا عليه وقت .. الخ , لكن اتفاجئنا إنه الاختبار كان صعب والله ! 

2- الكيمياء الحيوية "bio " : ساعتين في المعدل .. مالها كويزات ولها جزء عملي , أنا أخذت البايو عند استاذة خصوصية واللي كان لها الفضل بعد الله سبحانه اني اجيب الـ A+ .. بصراحة كان المنهج سهل .. اختبار الميد كان سهل نوعا ما, أما الفاينل كان فيه لغوصة والله دخت من الأسئلة وسرت اعلي صوتي عشان استوعب السؤال إلين سكتتني المراقبة 
طريقة مذاكرتي له : أقرى السلايدات وأي كلمة ما أفهمها اترجمها وما أنتقل للسلايد اللي بعده إلا بعد ما أفهم السلايد اللي قبله لأنه كل شي مرتبط ببعضه .
أما الاختبار العملي كان حوسة واخذت تجربة كنت غايبة فيها لكن الحمد لله كان سهل نوعا ما < بغض النظر عن القربعه اللي سويتها في المعمل 

3- الوراثة "genetics" : دي المادة مررررة كنت احبها كانت ممتعة ومعلوماتها سهلة وهي ساعتين في المعدل .. مالها كويزات لكن الميد والفاينل كانو سهلين ولله الحمد . 

طريقة مذاكرتي له : نفس طريقة مذاكرتي للبايو .

4- الحاسب : ساعتين في المعدل ..كان المنهج دسم وكلامه كثير .. لكن سهل برضو وله جزء عملي .
الاختبارات :
الكويزات : اختبرنا تقريبا 5 أو 6 كويزات .
الميد ترم والفاينل : سهلين .
الاختبار العملي : كان سهل ويختلف من أستاذة لأستاذه .
طريقة مذاكرتي له : ما كنت أذاكرله لأني كنت مركزة جدا مع الأستاذة وادون أي شي ممكن يوضح الشرح , كنت اذاكر فقط قبل الكويزات وطبعا ذاكرت للميد والفاينل بنفس طريقة مذاكرتي للبايو . 

5- مهارات التعلم : المادة اللي مال ام امها داعي .. ولها 3 ساعات في المعدل .
كان لها كويز واحد فقط وما عليه درجات .. لكن أنشطة المادة كانت كثيرة شويا .
المادة مالها اختبار ميد ترم .
الفاينل كان سهل وتااافه ومال أمه داعي .

طريقة مذاكرتي له :
أول شي أقرأ الوحدة كاملة وبعدين أأشر ع الأشياء المهمة واحفظها .
التعريفات كتبتها كلها في ورقة < طريقة ممتازة بالنسبالي في الحفظ ولكن تضيع وقت . 

الأساتذه : 
-اللغة الانجليزية : 
أول مرة درستها مع مس هيفاء شاطرة وطيبة وعسل وكل حاجة جمييلة في الحياة 
وبعد ما اتلغت شعبتنا درستها مع مس شيماء صديقي برضها شاطررة جدا اللهم صلي ع النبي وطيبة وعسل وكل حاجة جميلة في الحياة (( طيييييييبة وتراعي مررررة ربنا يسعدها ويوفقها )) .
-البايو : 
دكتورتين درسونا : 
1- هبة عدلي/ شرحنلنا جزئية الكربوهيدرات ( شاطرة لكنها سريعة مرررررة وعصبية ) .
2- فاطمة / شرحتلنا باقي المنهج (سريعة مررررررررررررررة لكن لو ركزتي معاها حتفهمي ) 
البايو العملي : 
درستنا الدكتورة نازك الطيب ربي يطيب أيامها مررررررررة طيبة وتفهم .
- الجينتكس : 
1- درستنا أستاذة اشواق الجهني ( شاطرة وفاهمة اللي بتشرحه , تسوي نفسها شريرة شوية لكنها طييبة وكيوت وكل حاجة جميلة في الحياة < للأسف اكتشفت هذا الشي نهاية الترم .. بصراحة مو كل المحاضرات كنت افهمها معاها لذلك كنت احتاج اذاكر مذاكرة مكثفة وطبعا ما كان عندي مانع لأنها كانت مادة ممتعة ) 
2- الدكتور نداء بوقري درسنا محاضرتين او 3 ( شاطر جدا ويفهم واسلوبه في الشرح جميل , أغلب المحاضرة تروح في الضحك )
- الحاسب : 
درستنا أستاذة بثينة كيوووت جدا وتفهم إذا ركزتي معاها .. حصلي موقف معاها في بداية الترم  في مرة مرت علي كلمة وما فهمتها وسألتها عنها وجاوبتني وبعدين سألتها عن جزئية وبرضها جاوبتني وبعدين وقفت وقالت : هادي البنت شاطرة ومركزة معايا على طول خليكم زيها  ومن قتها وانا ما اقدر أرخي نشاطي معاها ( أغلب الفصل ما كانوا يفهموا معاها و البعض احتج بلهجتها السودانية ) 
- مهارات التعلم : 
درستنا استاذة ندى خراشي وكانت أطيب شي في الحياة وتفهم وتراعي كثييييييييير وتساعد مره ربي يسعدها . 

حاولوا قد ما تقدروا تسألوا عن دكاترتكم بداية الترم وكيف اسلوبهم عشان لو لا سمح الله رحتوا مع استاذه شريره ( تخسف وما تراعي ) تحاولوا تحولوا لشعبة تانية .

و كدا نكون خلصنا الترم الأول .. ولله الحمد 

الترم الثاني 

الترم الثاني هو الصفاية اللي حتصفي الطلاب والطالبات فعلًا 

بصراحة شديدة .. هو أصعب من الترم الأول والضغط فيه أكبر .. لذلك لازم المذاكرة تكون مكثفة .
الترم الأول جبت معدل عالي ولله الحمد وهذا الشي حمسني جدًا للترم الثاني  

بالنسبة للمعدل الكامل .. الى الآن ما شفت ولا بنت قالت انها جابت الـ 4 .. لكن حطوا في بالكم إنها ماهي مستحيلة وممكن تجيبوها لو سمعتوا كلامي باذن الله  

1- اللغة الانجليزية " nursing " : مادة جدا جميلة وممتعة  واللي من جد تحسسك أنك داخل تخصص طبي .. 4 ساعات في المعدل  .. وهو كتابين nursing1 and nursing 2 من وجهة نظري كان الكتاب الأول يعتمد اعتماد كلي على الفوكابلري .. القرمر كان مكرر وقديم ونفس حق headway .
أما الكتاب الثاني كان الفوكابلري فيه مضاعف وكان فيه اختصارات كثير والقرامر كان جديد أو حاجة قديمة مزودين عليها أشياء جديدة
الكويزات : طريقة استاذتنا كانت بعد كل وحدة نختبر كويز وهادي الطريقة جدًا كويسة حاولوا تطلبوها من أساتذتكم .
طريقة مذاكرتي له : في البداية لاحظت انه في كلمات كثيره ماكنت فاهمتها ف أستأذنت من الأستاذة إنّي افتح جوالي وأترجم أو أفتح واحد من الكمبيوترات اللي في القاعة واترجم عليها أو اجيب التابلت حقي .
ف أي كلمة ما أفهمها كنت أأشر عليها أو أكتبها سواء كانت الكلمة في الريدنق أو اللسنينق أو في أي مكان من الدرس وبمجرد ما ألاقي فرصة " زي مثلا تسكت الأستاذة أو تخرج , تشرح معلومة سابقة , تتحدث بأحاديث جانبية " افتح المترجم واترجم .
في الميد ترم اختبرنا الكتاب الأول وكان الاختبار سهل بالنسبالي ولله الحمد لأني كنت اذاكر الكلمات أول بأول - لكن كانوا البنات شايفينه صعب والمنسق اعترف بصعوبة الاختبار ووعدنا إنه النهائي مح يكون صعب كدا .
الفاينل اختبرنا فيه الكتاب الثاني : تعبت وأنا أذاكره لكن حصدت ثمار تعبي في المعدل ولله الحمد .. الكلمات ذاكرتها أول بأول لذلك مو مرة تعبت فيها .. اضطريت اسحب على مذاكرة النيرسنق في نهاية الترم لذلك كانت مذاكرتي مكثفة للفاينل .. لأني هادي المرة ذاكرت القرامر من قلب لأنه كان جديد عليا وواجهت صعوبة في فهمه من الأستاذة ففتحت في اليوتيوب على شروحات لكل قرامر كمان قرأت محادثات الليسننق كلها وذاكرت حاجة اسمها الـ glossary فيها أغلب الكلمات بس برضو لازم تذاكروا أول شي من الدرس نفسه بعدين بعد ما تخلصوا تروحوا للقلوسري .

وفي كتيبات صغيرة كمان عليها 5 درجات بونس تنضاف على الدرجة النهائية " فرصة ذهبية " .. كانت طريقة استاذتنا هي انه كل بنت تشرح الكتاب اللي معاها بحيث تشمل كل مواضيع الكتاب في مدة لاتزيد عن 10 دقايق ولا تنقص عن 5 دقايق .

2- الكيمياء الحيوية "bio" : ساعتين في المعدل  .. المنهج أتعمق في نفس مواضيع منهج الترم الأول بالإضافة لكم محاضرة جديدة .
طريقة مذاكرتي له : نفس طريقة مذاكرتي للبايو في الترم الأول .
الميد ترم كان سهل ولله الحمد لكن الدكتور سوّا حركة ضايقتني شوية وهي انه حط 3 أو 4 أسئلة مرتبطة ببعض أو إن صح التعبير تعتمد على بعض , يعني مثلا رسمة وعليها سؤال يقول ايش هذا المركب والسؤال اللي بعده يقول ايش الرابطة اللي حيكونها هذا المركب والسؤال اللي بعده يقول ايش صيغة هذا المركب وكدا .
أما الفاينل كان صعب بصراحة ويبغاله تركيز وتفتيح مخ ومذاكرة من بدري .. مهو مستحيل الحل  

3- علم وظائف الخلية " physiology " : بـ3 ساعات في المعدل  .. مادة جدًا سهلة وممتعة مالها كويزات ولها جزء عملي , لكن عيبها الوحيد إنها تعتمد على الحفظ بشكل كبير
طريقة مذاكرتي له : نفس طريقة مذاكرتي للبايو ولكن بما أن المنهج كان فيه دورات كثير فكنت أرسمها أو احاول ألخصها في ورقة صغيرة وادبسها في المحاضرة " كنت اسوي هادي الطريقة في أي مادة يكون فيها جزئية صعبة أو كلام كثير وساعدتني مرررة في المذاكرة للاختبار الفاينل أو الميد " كمان أستعنت بمذكرات - ح أذكركلكم إسمها لاحقًا .

4- البرمجة : 3 ساعات في المعدل  .. بصراحة المادة مدري ايش دخلها في مجالنا الطبي بس يلا مشي حالك .. تتكلم البرمجة عن لغة الكمبيوتر وكيف تحولها للغة البشر ولغة المهندسين والعكس , لها جزء عملي على برنامج c++ .
طريقة مذاكرتي له : ما كنت أذاكر له إلا وقت الكويزات والميد والفاينل .. كان في مذكرة للمنهج ذاكرت منها وكان في سلايدات ذاكرت منها برضو .. ومراجعتي كانت من المذكرة لأنها تحتوي على أمثلة وكلام أوضح .
الكويزات كانت 4 كويزات .. الميد كان سهل مره وبنات كثير جابوا فيه الفل مارك لكن الفاينل أنا كنت شايفته متوسط السهولة لكن في بنات كثير خرجوا وهما زعلانين وطلبوا من المنسق يعطينا بونس ووو حوسة .

5- الفيزياء الطبية : نجي عند أهم مادة .. بـ 4 ساعات في المعدل  وهي فعلًا اللي صفّت أغلب الطلاب والطالبات .. المادة لها كويزات .. وواجبات وجزء عملي .
أنا أخذتها عند أستاذ خصوصي أتعب وأنا أقول شاطر صلاتي ع النبي .
طريقة مذاكرتي له : كنت اذاكر من أوراق الأستاذ اللي أغنتني وبشكل كامل عن شراء كتاب المنهج أو السلايدات , كنت أتدرب برضوا على موقعهم في حاجة اسمها self - test .
اختبار الميد والفاينل كانوا جدًا تافهين بالنسبالي وبالنسبة للي بيدرسوا عند نفس الخصوصي تبعي ..
في طريقة معينة لاحتساب درجات الميد والفاينل وهي السبب الرئيسي في تصفية الطلاب وهي إنه السؤال الواحد كان بـ 1.6 وبعد التقريب بدرجتين .. لذلك سووا كل اللي تقدروا عليه عشان تحصّلوا درجات . 

الأساتذة :
- النيرسنق :
مس هيلاري أو " عائشة بنت ديفيد " كما تُحب أن تُلقب .. أتعب وانا اقول انها طيبة وعسل ورائعة وخطيرة ورهيبة وكل ماهو لذيذ وطيب .. شاطرة و تعرف مصلحتنا أكثر من نفسنا 
- البايو :
1- درستنا دكتورة نازك الطيب  أول محاضرتين .
2- الدكتورة فاطمة شحات .
3- الدكتورة إيناس (تفهم وطيبة ) .
-الفسيولوجي :
درستني دكتورة انعام اللي من جد أعتبر نفسي محظوظة جدا إني درست عندها .. والله يا بنات شاطرة بشكل صلاتي عالنبي .. حالفة يمين تدخل المعلومة في راسك يعني تدخل ( تعصب اذا أحد هرج أو انشغل بالكتابة أو أي شي لازم تكوني معاها , لكنها طيبة وحنونة ربي يسعدها  ) .
الفسيولوجي العملي :
درستني الدكتورة وصال  .. ( طيبة وشاطرة لكنها حساسة شويا XD ) .
- البرمجة :
1- أستاذة منال ( ما درستني إلا محاضرة واحدة وكانت شاطرة ) .
2- أستاذة نوف العقل أظن كدا اسمها ( شاطرة وتفهم واسلوبها في الشرح سهل وطيبة .. لكنها مو مرة متداخلة مع الطالبات  )
3- درستنا أستاذة حميراء ( شاااااطرة تبارك الرحمن لكن بصراحة مو مرة كنت أفهم عليها ) .
- الفيزياء الطبية :
1- درستني الدكتورة روبينا سليم ( أطيب أستاذة قابلتها في السنة التحضيرية مرررررررة كيوت وعسل وشااااااااطرة تقريبا بنفس مستوى أستاذي الخصوصي .. كانت طيبة وتحبنا وحالفة يمين تخلينا نجيب الفل مارك في كل الاختبارات والواجبات  ) .
2- دكتورة أحلام بوسعيد  ( شاطرة وتفهم ) .
وكدا نكون خلصنا الترم الثاني  .. يارب تكونوا أستفدتوا وح أحاول ادخل المنتدى دايما عشان أشوف أحوالكم  

حاجة أخيرة .. ولازم تفهموها كويس وهي انه المذاكرة مو شي صعب .. ممكن تطفش .. لكن كل واحد مننا يعرف إيش اللي يحمسه صح ؟ شدّوا حيلكم وأوصلوا لأحلامكم بجدارة كونوا أقوياء  لا تتحطموا بمجرد ما تنقصوا .. بالعكس خلوه حافز لكم عشان تجيبوا درجات في الاختبار اللي بعده .. أهم شي أنكم تكونوا أقوياء وما تستسلموا بسهولة  

ح اكتبلكم كل الروابط اللي ممكن تساعدكم بإذن الله بالإضافة الى أسماء الأساتذة الخصوصيين .

قروب الدفعة على الفيس بوك :
https://www.facebook.com/groups/1004030512961141/
مدونة رحمة العيسى :
uniquyeear.wordpress.com
مبادرة بنيان على تويتر :
https://twitter.com/Bunyan_2016
فيديو رائع لازم تشوفوه (جزئين):
1- https://www.youtube.com/watch?v=S8gyXn_AEno
2- https://www.youtube.com/watch?v=EHhVeX8RkqM
تجربة خطيرة ورهيبة قرأتها السنة اللي فاتت :
http://www.yzeeed.com/vb/showthread.php?t=275922
مذكرة الفسيولوجي اخذتها من مكتبة الأسرى للدكتور ربيع " ما تغني عن السلايدات " .
البايو درسته عند أستاذة سهير - تدرس فسيو وجينتكس كمان .
الفيزياء أخذتها مع أستاذ تامر .
+ أرقامهم حتلاقوها في مدونة رحمة .

تجربة المسار الهندسي في جامعة الدمام

بسم الله الرحمن الرحيم

السلام عليكم ورحمة الله وبركاته

في البداية انا أسماء من جامعة الدمام - مسار هندسي 

حبيت اشارككم تجربتي مع التحضيري بحكم اني السنة اللي فاتت لما كنت بموقفكم كنت ابغى شيء زي كذا 

أول شي ابغى اقوله هو الهندسة ما تطلب منك انك تكون رسام او بلبل في الانجليزي لانها اشياء راح تكتسبها في التحضيري إن شاء الله لكن وجودها راح يساعدك اكيد. 

الهندسة انا اشوفها إلهام و شغف و حب و تغذية بصرية قبل كل شيء و اللي اقصده هو انك تتفرج ع صور كثيرة تخص هالمجال او حتى تقرأ عنه، خلونا نبدأ بالترتيب: 

في البداية راح يسوون لكم اختبار تحديد مستوى E و على أساسه راح تنحطون في الشعب + اختبار تحديد مستوى رياضيات لكن ماله أي تأثير. 

الترم الاول: 

اخذنا ٥ مواد ( E عام - مرسم - رياضيات - مهارات البحث - بدنية )

الدوام كنا عندنا يومين نطلع ٥ و باقي الايام ٣ او ١٢، كان عندنا بريك رسمي من ١٢ الى ١، و يوم الثلاثاء من ١٠ الى ١٢ يكونون ساعتين للانشطة و احياناً للاختبارات.

‏١)E: 

الانجليزي اشوفه مادة مهمة بما ان اغلب الدراسة راح تعتمد عليه، كان ٤ ساعات باليوم و بينهم بريك نص ساعة ( مقسوم ساعتين للقراءة و الكتابة و ساعتين للاستماع و التحدث)، المفردات كانت كثيرة فيه و تحتاج مراجعة لكنه في المقابل سهل و خفيف، بدأنا بكل شي حبة حبة مثلا الكتابة بدأنا بكيف نكتب قطعة قصيرة و الاساتذة جداً طيبين و متفهمين و يراعون لو كان عندك ضعف، دائماً خلوا علاقتهم فيهم قوية عشان تقوون لغتكم، جنسياتهم مابين هنود و امريكان و بعضهم سعوديات لكن لا يتحدثون عربي ابد. 

بالنسبة للاختبارات هي مادة سنوية يعني اختبارها في الترم ٢ لكن فيه اختبارين (2 Tests ) كل واحد فيهم ١٠ درجات. 

٢)المرسم: 

هاذي المادة عبارة عن اساسيات التصميم و الهندسة كانت مرة في الاسبوع لمدة ٤ ساعات جزء منها نظري و جزء منها عملي، تدرس بالعربي لكن المصطلحات E في البداية راح تتعلمون اشياء بسيطة زي الزخارف الاسلامية، و لا تشيلون هم لانه حتى النقطة و الخط راح تتعلمون كيف ترسمونها، بعدها راح تبدون المشروع النهائي و اللي عليه ٣٠ درجة طبعاً هو الفاينل لانه مافيه منه اختبار نهائي تحريري، هو عبارة عن رسومات هندسية لاشكال مجردة، فيه اختبار ميد تيرم واحد و جزء منه عملي و جزء منه نظري عليه ١٠ درجات، المادة جداً جميلة صحيح الدكاترة شديدين لكن متمكنين استفيدوا منهم قد ما تقدرون.

بالنسبة لهاذي المادة انا انصحكم تعتمدون ع نفسكم فيها لان الترم الاول راح يكونون معاكم خطوة لكن الترم الثاني لا راح يخلونكم تعتمدون على نفسكم اكثر، و دائماً حاولوا تطلعون اكثر من فكرة الى ان توصلون للشي اللي ببالكم، وتقبلوا نقد الدكاترة صحيح احياناً مزعج لكن حاولوا تعرفون كيف تتعاملون معاه وتذكروا قبل كل شي انه مو نقد شخصي، متأكدة راح تسمعون كلام كثير سلبي عن هاذي المادة بالذات و غيرها من المواد لكن سكروا اذانيكم و امشوا. 

٣)رياضيات: 

تدرس بـ E لكن لو كانت الدكتور/ة عربية راح تلقون جزء من الشرح عربي، هو عبارة عن رياضيات الثانوي لكن بـE مع زيادات بسيطة، محاضرتين في الاسبوع وحدة مدتها ساعتين و الثانية ساعة، يوجد اختبارين (2 Tests ) كل واحد ١٠ درجات + ٥ كويزز تقريباً كل واحد ٥ درجات( واحد منهم اون لاين) + الواجبات تكون اون لاين كل اسبوع واجب + اختبار نهائي ٤٠ درجة . 

٤)مهارات البحث: 

مادة بسيطة جداً تُدرس بالعربي ( السنة القادمة بـE) تتعلمون فيها كيف تعدون بحث علمي، محاضرة وحدة في الاسبوع و مدتها ساعتين و يوجد فيها اختبار نهائي فقط من ٤٠+ يوجد بحث علمي في مجال الهندسة ( مجموعات او فردي) ٣٠ درجة. 

٥)البدنية: 

مادة ممتعة و بسيطة كانت زي البريك لنا من تعب الدراسة، محاضرة وحدة في الاسبوع لمدة ساعتين كان جزء منها نظري و جزء منها عملي، الجزء العملي عبارة عن تمارين كنا نسويها و اختبار الميد تيرم عملي، اما الجزء النظري يكون داخل في النهائي ٤٠ درجة. 

الترم الاول كان بسيط و انصحكم تجيبون فيه معدل عالي قد ما تقدرون، دائماً اسألوا الدكاترة لانهم يحبون اللي يسألون و يعرفون انهم جادين، و كونوا ناس معطائين لان الدنيا اخذ و عطا. 

الترم الثاني: 

اخذنا ٧ مواد ( E عام - E تخصص او اكاديمي - رياضيات ٢ - مرسم٢ - حاسب - فيزياء- مهارات اتصال)، يعتبر اثقل من الاول و محتاج مذاكرة اكثر و لكن لا يعني صعوبته. 

اغلب الايام كنا نطلع ٥ او ٤.

‏١)E عام: 

هو استكمال للي كان في الترم الاول، لكن عدد المحاضرات راح يقل بحيث يصبح ساعتين في اليوم و ليست يومية، راح يكون فيه Test واحد من ١٠ و اختبار فاينل من ٥٠. 

‏٢)E أكاديمي: 

راح يكون متخصص في الهندسة و التصميم و كذلك راح يركز على الكتابة مثل كتابة المقالات، يوجد فيه اختبارين تقريباً ( 2 Tests) من ١٠+ اختبار نهائي، المحاضرات ليست يومية و مدتها ساعتين. 

٣)رياضيات ٢: 

استكمال لرياضيات ١. 

٤)مرسم٢: 

في الترم الثاني راح يتم التركيز على التصميم المعماري، و راح يتم البدء على طول في رسومات المشروع النهائي، بالنسبة لي صحيح انه اصعب لكن اجمل بكثييير لاني حسيت بواقعيته و دائماً اقول للي حولي تخيلوا ان هذا المشروع ولدكم و اختاروا له الزين و الافضل دائماً، احنا طبعاً انقسمنا نصين ناس صممت كشك و ناس صممت كارافان ( كل طالب/ة له مشروعه الخاص) و بالنسبة للاختبارات نفس الترم الاول. 

٥)حاسب: 

المادة اشوفها سهلة بكل صراحة كانت بالنسبة لي زي البريك طبعاً مرتين بالاسبوع و مدتها ساعتين، تدرس بـE كانت عن الوورد و الاكسل و الاكسس و هالبرامج، بالنسبة للاختبارات كان فيه ميد تيرم واحد من ١٥ و عدد من الكويزز و فيه مشروع نهائي على برنامج الاكسس من ٣٠+ الاختبار النهائي. 

٦)الفيزياء: 

تقريباً مشابه لفيزياء الثانوي لكن بمستوى اعلى، انا اشوف ان المادة تحتاج مجهود و تدرس بـE، بالنسبة للاختبارات فهي نفس نظام الرياضيات. 

٧)مهارات الاتصال: 

مادة ابسط من البسيطة تتكلم عن مهارات الاتصال بواقع الحياة و تدرس بالعربي( لكن السنة القادمةE) لايوجد فيها الا اختبار نهائي من ٥٠ او ٤٠ اظن، و يوجد مشروع تطوعي ( مجموعات) من ٣٠، كانت محاضرة بالاسبوع مدتها ساعتين. 

بالاخير اعتذر على الاطالة و لكن انصحكم بالاجتهاد و الابتعاد عن اي كلام سلبي، و لا تأجلون اي عمل ابداً معليش ممكن تحسون بضغط و تعب و سهر لكن لذة الشيء ما تجي الا بعد التعب، و حبوا الشي اللي تدرسونه و انبسطوا فيه لانكم ما جيتوا في هالمكان الا لانكم تستاهلونه و قده ان شاء الله 🏻.

للتواصل معي: 

Twitter: @Asl_1235

السنة التحضيرية بكلية الطب في جامعة الباحة - الطالب أمجد يحي

بسم الله الرحمن الرحيم

السلام عليكم ورحمة الله وبركاته

الحمد لله رب العالمين والصلاة والسلام على خير خلق الله محمد بن عبدالله وعلى صحبة أجمعين :

أما بعد :

في البداية حبيت اقسم تدربتي إلى أجزاء حتى تسهل للقارئ وكذلك يستطيع يتنقل للأشياء اللي حاب يستفيد منها بشكل أسرع محتوى التجربة هو:

1-  كيف نظام الجامعة في القبول ؟

2-  طبيعة تخصص الطب البشري (سنوات الدراسة / ماذا بعد التخرج ؟ )

3-  كيفية نظام دراسة السنة التحضيرية (الفصل الأول /الفصل الثاني)

4-  أشياء لازم يعرفها الطالب عند دخوله لتخصص الطب البشري

5-  نصائح عامة للطلاب في السنة التحضيرية

*ملاحظة: ما بين القوسين قد يكون تعليق من الكاتب أو سؤال للتوضيح المعلومات بشكل مبسط

طيب الآن بعد أن قسمنا وفصلنا خلوني أبدأ في العميق((متعوب على كلمة العميق !!هههه))

كيف نظام الجامعة في القبول ؟

أحد الأشياء اللي تميز جامعة الباحة اللي هو أنها تقبلك في الكلية اللي تبغاها بشكل مباشر (( كيف يعني ؟)) يعني أنه عندما تبدأ بالتسجيل في موقع الجامعة تبدأ ترتب رغباتك بالكليات بحيث مثلا تحط في الرغبة الأولى هندسة و الرغبة الثانية طب وبعدين يتم فرز الأسماء في الموقع وتعرف وين انقبلت في أي كلية بس في أغلب الجامعات النظام هو مسارات (وش معنى مسارات تراك أقلقتنا؟) يعني أنه راح يكون هناك مسارات مثل مسار صحي ومسار علمي بحيث أنك تتنافس مع الطلاب في السنة التحضيرية وبعدين تتخصص في الكلية اللي تبيها في نهاية السنة .

الحقيقة النظام هذا ريحني كثير وكذلك الكثير من الطلاب وأكيد في ناس معارضه لهذا النظام ومن حقهم ,الزبدة راح تدخل السنة التحضيرية وانت مرتاح وما تبغى غير تحصل على معدل عالي وانت في كامل الراحة النفسية وعادي لو تنتهي بمعدل نازل ما راح تتحول إلى كلية أخرى بسبب المعدل ع العموم لا تهمل في السنة هذي فهي مهمة جدا لأنك تحصل معدل عالي وكذلك سهل جدا .

شكلنا طولنا بذا الموضوع (لازم نتفلسف وكذا ههاي)

طبعا التسجيل في جامعة الباحة اللي لازم تعرفة عنه لازم تواصل عشان تسجل (يبغون يعلموك أن تذكر قبل ما تسجل من طلب العلا سهر الليالي وانا اشكرهم من هذا المنبر)لان الموقع يعلق ومدري ايش وحوسة والله يعين اللي بيقدم على الجامعة (هههههه)

طبيعة تخصص الطب البشري (سنوات الدراسة / ماذا بعد التخرج ؟ )

طبعا بعد الحوسة اللي فوق قبلت طب ولله الحمد وكانوا يطلبون موزونة أعلى من 85

خلوني أتفلسف عليكم عن تخصص الطب :

هو تخصص يعنى بدراسة جسم الإنسان من جميع النواحي يعني تعرف تشريح جسم الإنسان وطريقة عمل وظائف الجسم والأمراض وكيفية معالجتها وعدد سنوات الدراسة الفعلية 6 سنوات +سنة إمتياز تقدر تقول 7سنوات

ثلاث سنوات دراسة أساسية (Basic science)+  وثلاث سنوات كلينيكية يغلب عليها التطبيق وسنة إمتياز كلها تطبيق في جميع التخصصات إن صح التعبير

وبعد ذلك تتخرج بمسمى (طبيب عام) وتدخل برامج التدريب الطبية وتختلف من تخصص إلى تخصص في مدة السنوات وبعد ما تخلص البرنامج تسمى ب (أخصائي )

يعني بعد ما تتخرج يكون أمامك تخصصات وأنت تختار أي تخصص مثل :

1-  باطنة    2- جراحة عامة    3- جراحة مخ وأعصاب

4- جراحة عظام      5- طب المخ والأعصاب   6- علم أمراض   7- طب أسرة

وغيرها الكثير للي حاب يستزيد أكثر بهذا الخصوص في كتيب ممتاز أسمة (مستقبلك الطبي) ممتاز جدا يتكلم عن كل تخصص وعن طبيعة عمله أنصحكم بقرائته .

كيفية نظام دراسة السنة التحضيرية (الفصل الأول /الفصل الثاني)

جينا للدراسة والقلق (عند بعض الطلاب) قبل ما تبدأ تقرأ هذا القسم أبغى منك (أنك تقرب أذنك شوي زد قرب أكثرر وأكثرر) لأن في كلام مهم بينكتب :

أولا: في فرق كبير بين مواد الفصل الاول والثاني من ناحية كمية المعلومات  ونوعيتها والضغط الدراسي ..

ثانيا: الفصل الأول مريح جدا وأكثر بكثير من أي فصل مر عليك بالثانوي أما الثاني بيكون متعب شوي وبتتغير الأمور (أتكلم عن الطب في السنة التحضيرية )وغالبا جميع الكليات تكون أصعب في الفصل الثاني لأن المواد من الكليات

الفصل الأول :

هذا الفصل كل السنة التحضيرية بكلياتها يدرسون نفس المواد أما الفصل الثاني تختلف حسب الكلية كل اللي عليك في هذا الفصل أنك تنبسط وترتاح وتستمتع باللي تدرسه الشي الممل فيه أن الدوام فيه متعب وبين المحاضرات بريكات طويلة وما تدري وش تسوي فيها تقريبا 3 ساعات بعض الايام أقل ممكن ساعتين كنت أداوم من 8 وأنتهي بكثير 4 ونص أرجع البيت تقريبا على 6 المغرب بعض الأيام نخلص 2ونص يعني على العصر صحيح ممكن المسافة من بيتي للجامعة تقريبا ساعة لكن المهم أن الدوام الصدق مو بذاك الأهمية خلونا نشوف مواد الفصل الأول :

1-  مهارات اتصال     2- مهارات تعلم ودراسة     3- لياقة بدنية    4- إنجليزي 

5-ريادة أعمال    6- مهارات تفكير    7- حاسب آلي

أولا: مهارات أتصال:

المادة هذي عليها 1ساعة في المعدل يعني تأثيرها بسيط في المعدل ولكن حقيقة أنا استفدت من هذي المادة بقرائتها في البيت أكثر من حضور المحاضرة للاسف المحاضر كان ممل في أسلوب شرحه كل اللي عليك تركز فيه هو الاختبار النصفي لازم تجيب فل فيه وسهل جدا تقدر تجيبها بس ركز مع المحاضر على الأشياء اللي هو عادها أكثر من مرة وان شاء الله فالك A+

ثانيا: مهارات تعلم ودراسة

مادة مفيدة صراحة لكل طالب وطالبة وتعلمك بعض الأشياء وتصحح لك بعض المعتقدات الخاطئة في المذاكرة وعليها 1ساعة في المعدل الصدق المحاضر اللي كان يدرسنا المادة كان يعطينا محاضرات في علم النفس وكان مستحقر المادة بس أنا استمتعت معه في محاضراته أما المادة كنت أقراها مع نفسي لان مواضيعها شدت أنتباهي الاختبار الشهري كان من محاضراته عن علم النفس واعتقد الاغلب أخذ كاملة وكان متساهل معنا وحدد لنا في النهائي وأعتقد الكل جاب A+(أتكلم عن الكلاس حقنا كان عددنا 25 طالب ويختلف المحاضر من كلاس إلى كلاس ).

ثالثا: لياقة بدنية

مادة لم تعطى حقها وعليها 1ساعة في المعدل  الصدق وكان محاضراتها للاسف غير مفيدة البته محاضرها كان واحد أردني كل محاضراته عن حياته الشخصية وقصص عن الرومان وعن بلدة (الزبدة كان مزودها حبتين ) محاضرة وحدة تعلمت منها قياس الضغط والسكر والبقية لعب في غرفة فيها العاب طاولة مثل تنس وفرفيرا وبلياردو والاختبار الشهري بسيط كان هو حدثنا عن الاشياء المهمه قبل الاختبار الشهري أما النهائي كان من كتاب وكان مرهق من حيث ما تدري وش تذاكر وش تحفظ بقية الكلاسات كانوا مرتاحين كلاسنا كان في حوسة مع ذا المحاضر ولكن مع ذلك كثيرين جابوا A+ هذي المادة حرام ما تجيب فيها A+

رابعا: إنجليزي

مادة مهمة في المعدل عليها 3 ساعات ومفيدة للطلاب ولكن ساعاتها كثير تقريبا كل يوم 4 ساعات لتتخصصات الصحية كلاسات الطب كان على كل كلاس مدرس واحد وممكن يعطي ساعتين فقط بس العلوم الطبية أخبر واحد من زملائي (أيام الثانوي ) يقولي عندهم مدرسين لكل كلاس بحيث كل واحد يعطي ساعتين, المهم أخذنا كتاب ونص في هذا الفصل وكانت مرة سهلة وبسيطة ولهذي المادة نظام خاص في حسبت الدرجات أغلب المدرسين متساهلين مع الطلاب مواضيع كانت تتكلم عن الماضي البسيط المضارع أشياء أخذناها في الثانوي وبسيطة لكن الصراحة كنت اذاكر القرامر من الكتاب والكلمات اللي يحلها المدرس والبقية أسحب عليه لان الاسئلة تجي بطريقة غير مباشرة بس تبغى منك تفهم الفكرة والحمدلله جبت A+ واغلب الكلاس اللي معي .

خامسا:ريادة أعمال :

مادة عليها 1 ساعة في المعدل مواضيعها مشوقة مثل كيف تصير رائد أعمال وانواعهم وكذا (اللي له في البزنز بتعجبه كثير) الاختبار الشهري كذلك ركز فيه والمادة بسيطة جدا ومفيدة كل  الكلاس أعتقد جابوا أ+ فيها مشروع نهاية الفصل معك مجموعة من الطلاب واسئلتها موحدة بين الطلاب والطالبات (صار يومها قصة مضحكة في الاختبار النهائي الزبدة الطلاب تحجفلوا بطريقة رسمية ههههه)

سادسا: مهارات تفكير :

مادة عليها 3 ساعات مهم جدا تجيب فيها أ+ عشان تضمن معدل عالي زيها زي أهمية الأنجليزي تتكلم عن كيف تفكر بطريقة سليمة ما الفرق بين المقارنة والمقابلة واشياء كثيرة تميل الى علم النفس كثير وكان اللي يدرسنا برفسور مصري كان متعاون جدا واسئلته سهلة وبسيطة

سابعا: الحاسب الآلي .

مادة بسيطة وعليها 2 ساعتين في المعدل كذلك مهمة واللي له خبرة في الوورد والبوربوينت والاكسل اعتقد سهلة جدا وتقدر تضمن فيها ال أ+ بإذن الله واسئلتها كذلك موحدة

بكذا خلصنا الفصل الأول وبسيط كان في أوقات فراغ كثيرخصوصا بين المحاضرات  أغلب المواد سهلة وبسيطة .

الفصل الثاني :

أفضل ما فيه الدوام جميل فيه وما في بريك في اليوم الا واحد اللي مدتة ساعة وبالكثير تخلص 2 ونص وتبدأ تاخذ مواد في التخصص اللي أنت فيه وكانت موادنا كالتالي :

1-  مديول العلوم الطبية الأساسية Premed

2-  الإنجليزي

3-  ثقافة صحية

4-  بحث ومقال

مواد شوي يبغالها شغل حبتين لكن ع العموم تتيسر الأمور بقدرة مدبر الأمور (كيف السجع بس خطير *_^) .

أولا: مديول العلوم الطبية الأساسية Premed

هذا المديول جاب للكثير من الطلاب وجع الرأس والقلق لكن أنا أقول المديول بسيط لمن ذاكر وأعطى المادة حقها وعليه 9 ساعات .

أول حاجة وش معنى مديول ؟ عبارة عن مجموعة من المواد تتحدث عن شيء معين مثلا نقول مديول العظام راح يندرج تحته عدة مواد زي مادة التشريح تعرف فيها تشريح العظام وأماكنها بعدين تأخذ مادة علم الوظائف تعرف وظيفة كل عظمة بعدين مادة علم الأمراض الأمراض الشائعة لهذي العظام بعدين مادة علم الأدوية تعرف الأدوية اللازمة لعلاج هذا الأمراض كلها هذي المواد تندرج تحت هذا المديول .

المواد اللي تندر تحت هذا المواد هي : (كلها تتحدث عن جسم الانسان)

1-  الكيمياء الحيوية      2- الفيزياء الطبية     3- الأحياء   4- المصطلحات الطبية  

5-   الأحصاء الطبي

الكيمياء الحيوية:

مادة ممتعة تتكلم عن البروتينات والدهون وDNA  و RNA و الماء وخاصية الانتشار والاسموزية وغيرها يعني كأنها تراجع لك بعض الاشياء في الثانوي وفيها تعمق شوي ويبغالك تركز على هذي المادة من ناحية الفهم لانك راح تبني عليها معلومات بعدين في السنوات القادمة فأهتم أن يكون بنائك قوي بفهمك والمحاضرين لهذي المادة ممتازين في الشرح وعن نفسي أعتمدت على السلايدات وكتاب أخذته من مكتبة الجامعة كان كويس لكن ما يحتاج الا السلايدات وكافية

الأحياء :

مادة تتحدث عن الخلية وأجهزة الجسم وبعض الأمراض الشائعة وكان مرجعها كتاب ممتاز وسهل في لغته للطالب وانا اعتمدت على الكتاب وكذلك على فيديوهات أكاديمية خان كانت ممتازة وتشرح بعض الأحيان بطريقة أنا أشوفها أفضل من المحاضر لهذي المادة ...

الفيزياء الطبية :

المادة هذي ممكن ناس من الطلبة ما يطيقون الفيزياء من الثانوي وانا كنت واحد منهم والسبب الصراحة سوء خلفيتي العلمية في الثانوي ولكن الصراحة حبيت الفيزياء بعد ما اخذتها في الكلية أولا طريقة شرح المحاضر وكذلك عناوين المادة كانت شيقة بالنسبة لي وزاد حبي للمادة أكثر كانت تتكلم عن الصوت والضوء والعلاج بالاشعاع وكيفية عمل المناظير واشعة الX-ray وغيرها من المواضيع المرتبطة بجسم الانسان واعتمدت السلايدات وكانت كافية وزيادة

المصطلحات الطبية :

مادة ما لها الا تقريبا 6 محاضرات من المديول كامل وكانت تعلمك كيف تقرأ المصطلحات الطبية وأنواعها والقابلة للتحليل(يعني تقسم الكلمة أكثر من جزء لمعرفة معناها ) والغير قابلة للتحليل وبسيطة ..

الإحصاء الطبي :

مادة ما لها إلا محاضرة واحدة فقط في المديول كامل وكانت آخر محاضرة وكثير من الطلاب ما أعطوها أهتمام (والمشكلة جاء منها في النهائي وحقرا بقرا للاسف) بالنسبة لي قريتها وكانت الاسئلة نوعا ما سهلة ..

وكان كذلك في عملي للمادة في جميع ما أخذته من معامل يعني عملي للاحياء والفيزياء والكيمياء في أختبار واحد , وكانت الاختبارات الشهرية نفس الطريقة (تقدر تقول زي التحصيلي

وفية انشطة مثل SDL بحث تقوم به في نهاية الفصل يعطوك الموضوع وانت تبحث عنه

وكذلك PBL انت ومجموعة من الطلاب تجلسون مع دكتور تأخذون حالة وتحاولون تحللونها

فيه Seminars انت ومجموعة من الطلاب تشرحون موضوع امام الطلاب وعلية تقييم من قبل دكاترة ..

أشياء لازم يدركها الطالب عند دخوله لتخصص الطب البشري:

1-   أن لا يعني دخولك للطب بأن أوقات فراغك أنتهت وما في الا الكتب تعتكف عليها بل أن الطب يصقل المواهب صحيح راح تقضي اوقاتك كثيرة في الدراسة ولكن بإمكانك تجد وقت تقضيه في تطوير مواهبك وللطلعات والترفية عن النفس.

2-  حقيقة الكلية في تطور فحاول ان يكون من أهدافك أن تضع بصمتك في الكلية إما بإقتراحات للإدارة في تطوير الحملات التطوعية أو صناعة برامج من عندك تنمي فيها طلاب الكلية والإدارة متعاونة في ذلك .

3-  عليك أن تضع أهداف لنفسك بعد التخرج وتقرأ أكثر في التخصصات وعن البرامج التدريب المحلية والخارجية ربما يشوفها البعض باقي بدري لكن صدقني أنها مهم جدا تكون واعي بالأشياء من حولك والتغيرات اللي تحصل في هذا المجال من تطور .

4-  أستمتع بكل معلومة تأخذها وأعط المعلومات حقها في الفهم والحفظ فرب معلومة تنقذ بها حياة وحاول أن الدرجات ما تكون شغلك الشاغل بل استمتع واستزد في المعلومات لتصبح طبيبا أفضل ,ولا تقارن نفسك بغيرك (حط تحتها مليون خط)

نصائح عامة للطلاب في السنة التحضيرية:

1-  لازم تعرف أن ما في تخصص أفضل من الثاني كل التخصصات مهمة وصدقني مدى إبداعك وحبك للتخصص وتميزك راح يوفر لك فرص عملية وتعليمية (والله لا يضيع تعب عبده والأرزاق بيد الله تعالى )

2-  أحرص كل الحرص على صحبة الناس المتميزة والطموحة والصالحة فلها أثر كبير أكثر مما تتصوره

3-   حاول أنك ما تنتهي من السنة إلا وانت مشارك في برامج تصقل مواهبك وكذلك ترفيهية (خصوصا العزابية) تقضي فيها أوقات ممتعة وتكافئ نفسك بعد شيئ أنجزته وكذلك تكسب فيه خبرات وصحبة طيبة , في برنامج اسمه (النشاط الجامعي) أنا أحد أعضاء أستفدت منه الكثير وكسبت فيه صحبة طيبة ...

4-  تذكر أن بدايتك في الجامعة معناته صناعة سيرة ذاتيه فيك فأحسن بنائها وتعبئتها (ما لقيت إلا كلمة تعبئتها عاد مشوها لي J)

5-  ذاكر أول بأول الكلام هذا في الفصل الثاني ولكل التخصصات لا تأجل شيء وتذكر عندك صيفية تستمتع بها (بقدر قوة البدايات تكون روعة النهايات ) لا تخلي نفسك تعيش ثلاث أشهر ندمان ومتحسف فيها ...

6-  شارك زملائك بالمعلومات المهمة وحاول أن تكون مبادر في فعل الخير واحتسب الأجر عند الله وتذكر أن زكاة العلم نشره وصدقني شعور العطاء شعور جميل ويزيد من ثقتك بنفسك ..

أتمنى أني أزلت عنكم الكثير من الشكوك وكنت خفيف في الطرح وأي استفسار هذي حساباتي للتواصل

Ask fm:@Dr_Amjad_Alzhrani

Twitter: @amjad_zhrani